三十三歲柯煒林（Will）上月尾於社交平台透露患上肺腺癌第四期，目前正在接受標靶藥治療，需按照身體狀况決定能否演足五十場舞台劇《笨蕉大劇院》。《笨》團隊亦決定另覓替補人選演出。《笨蕉大劇院》日前正式公演，劇團在社交平台宣佈柯煒林的角色暫時由演員余家溢作替補。柯煒林於首演謝幕時驚喜現身，全場掌聲雷動。

　柯煒林跟觀眾打招呼及鞠躬致謝：「多謝你哋一直以嚟嘅關心同鼓勵，唔好意思，我呢個衰仔要令大家擔心。」當台下觀眾喊出「加油」，柯煒林忍不住講笑：「呢個咪冇睇我啲Post囉，我都話唔要聽加油㗎，我要聽嘅係咩呀？——一、二、三!」他一喊「USH」，台下即時回應：「我愛你!」氣氛溫馨感人。

　柯煒林續指：「我好榮幸，第一個參與嘅舞台劇就係同呢一班台前幕後嘅工作人員、同埋演員，一班咁正嘅人去合作，因為無論喺我發生咗啲小毛病之前定之後，佢哋都好照顧我，劇場真係一個好魔幻嘅地方。」他向觀眾承諾：「放心，我冇事。我會照顧好自己嘅身體，然之後再喺呢度表演畀大家睇。」全場報以熱烈掌聲。他再問觀眾：「你哋會等我㗎嘛？」

　  聽到觀眾的熱情回應後，即擺出大心心手勢致謝回禮。林海峰又鼓勵現場觀眾為柯煒林送上祝福，觀眾即時大聲呼喊支持，演員們亦送上擁抱給予鼓勵。◇