湯洛雯RoxanneTong5月6號踏入39歲生日，每年呢個大日子佢都會同摯親好友度過，今年都唔例外，同老公馬國明及親友慶祝時，靚湯就收到一大束鮮花充滿溫馨嘅愛，仲孖住妹妹合照一齊靚爆鏡。其中靚湯同馬明嘅合照夫妻簡直甜蜜滿瀉，幸福嘅靚湯仲留言指過去一星期被濃濃嘅愛、歡樂同食物包圍住，好多謝身邊親友同大家送上嘅生日祝福。

　靚湯喺過去一星期頻頻應約生日飯局，食咗唔少好嘢，單係見靚湯展示嘅相片中已經有五個大蛋糕，仲有傳統壽桃包，寓意健康長壽。眾多生日會當然唔少得靚湯圈中好姊妹蔣家旻AngelChiang、TracyChu朱千雪、Jennifer岑杏賢啦，識於微時嘅佢哋多年嚟都互相陪伴大家成長，一齊經歷轉變，如今四位已經成為幸福人妻！◇